Íslenskur Stjörnuatlas er bók ætluð öllum sem hafa áhuga á stjörnuskoðun og stjörnufræði. Um er að ræða leiðsögubók um stjörnuhimininn og hvað má sjá í hinum 53 stjörnumerkjum sem sjást að öllu eða einhverju leyti frá Íslandi. Þar má skoða stjörnur og stjörnuþyrpingar, geimþokur og fjarlægar vetrarbrautir.

Stjörnuhiminninn má skoða með ýmsum aðferðum. Í sinni einföldustu mynd þarf ekki mikinn búnað til stjörnuskoðunar. Með berum augum sjást jafnvel nokkur forvitnileg fyrirbæri. Hins vegar fá margir sér fljótlega handkíki eða stjörnusjónauka til þess að skoða fleira og sjá stjörnur og djúpfyrirbæri.

Það er alveg sama hversu vanir stjörnuskoðarar eru og með hvaða aðferð er skoðað, þ.e. með berum augum, handkíki eða stjörnusjónauka, að nauðsynlegt er að hafa stjörnukort og leiðarvísi við hendina. Í stjörnuatlasinum er vísað á fjölda forvitnilegra djúpfyrirbæra sem sjáanleg eru frá Íslandi. Mörg þeirra eru björt og sögufræg en síðan eru líka fyrirbæri sem eru hrein áskorun fyrir stjörnuskoðara sem vilja státa sig af því að hafa séð þau með eigin augum.

Bókin hentar jafnt byrjendum sem lengra komnum og í upphafsköflum eru skýringar og góð ráð til að auðvelda stjörnuskoðun. Bókinni fylgir stjörnuskífa sem sýnir stöðu stjörnumerkjanna á öllum árstímum.

Íslenskur stjörnuatlas hreppti fyrsta sæti bókmenntaverðlauna starfsfólks bókaverslana yfir fræði/handbækur fyrir jólin 2004.